هل البنت ممكن
تترسم شماسة ؟!

هل ينفع البنت تترسم  شماسة؟! وهو يعني أيه كلمة شماسة أصلًا؟

***

طيب، فيه شماسات بنات أيوة.. بس لهم شروط معينة ووظيفة معينة.. مش زي الشمامسة الرجالة خالص

والكتاب المقدس ذكر أمثلة كتيرة
وكلمة شماسة يقصد بيها (( تاسوني المُكرَسة))

 -: أمثلة

واحد - فيبي

بولس الرسول في رسالة رومية اصحاح 16 بيقول ((أُوصي إليكم بأختنا فيبي خادمة الكنيسة ............ "لأنها صارت مساعدة لكثيرين ولي أنا أيضًا" ))

اتنين - مريم المجدلية

الرسل نفسهم كانوا رسموا "مريم المجدلية " ك شماسة ... هتلاقوا الكلام ده موجود في سيرتها في السنكسار يوم 28 ابيب

تلاتة- الشهيدة تكلا

التاريخ بيحكلنا عن القديسة " تقلة/ تكلا" أول شهيدة في المسيحية
وكانت تلميذة بولس الرسول.. وكانت بتساعده في الخدمة

-:أربعة

الانجيل في لوقا 8 بيحكلنا عن أن كانت فيه ستات كتير ربنا شفاهم, وبعد كدا اشتغلوا عادي
وخدموا عادي معاه وكانوا مسؤلين عن الصرف مثلًا
((بعض النساء كن قد شُفين من أرواح شريرة وأمراض ............ واُخر كثيرات كن يخدمنه من أموالهن.))

طيب ايه الشروط؟

#أولًا : أنها تكون إما أرملة أو تكون عذراء بتول

كلمة أرملة يعني اتجوزت مرة واحدة  وجوزها مات. ومتقلش عن 60 سنة

بتول يعني متجوزتش ومش هتتجوز. ومتقلش عن 40 سنة

.

#ثانيًا : تكون مشهود لها بأخلاقها الكويسة وأعمالها الصالحة ... ودي هنلاقيها واضحة في الرسالة الأولي لبولس الرسول لتيموثاوس الاصحاح التالت .. ((كذلك يجب أن تكون النساء ذوات وقار، غير ثالبات، صاحيات، أمينات في كل شيء. )) .. والقديس يوحنا ذهبي الفم يؤكد أن القديس بولس هنا يقصد بكلمة النساء .. أنهم الشماسات مش الستات في العموم يعني

 :وفيه وظايف مُحدَدة, الرسل كتبوها في الدسقولية ( تعاليمهم ) .. زي مثلًا

بتساعد أبونا في تعميد الستات .. لكن مش هي اللي بتعمد.. لأن اللي بيعمد هو الكاهن بس لكن مش ست أبدًا لأن الكهنوت للرجالة بس

تنظم أماكن الناس في الكنيسة ... وتنظم اللي بيتناولوا والمفروض تتأكد من كل واحدة  هتتناول أنها محتشمة وأنها أساسا مسيحية أرثوذكسية وبتعترف. 

خدمة افتقاد الشابات والبنات ... خدمة مدارس الأحد ... خدمات الحضانة .. خدمة الطلبة المغتربين .. خدمة زيارة المرضي ... الملاجىء وديار الأيتام .... دار العجزة .... المشاغل اليدوية والحاجات دي..   وإلخ

دة باختصار فكرة الشمامسات

الشماس الراجل بقي ده رتبة من رتب الكهنوت .. فعشان كدا يقدر يخدم علي المذبح ويقدر يبقي كاهن فيما بعد
إنما مفيش كهنوت للست .. فدورها ك شماسة أو مكرسة بيكون في الإطار ده